Durant l'emprima mesadad dals onns 1970 resulta in emprim project da construcziun detaglià per in tunnel da basa dal Gottard. Il tunnel duai augmentar las capacitads dal transport da rauba. L'onn 1971 ha il Cussegl federal incumbensà las VFF, sin basa dal rapport da la cumissiun «Tunnels da viafier tras las Alps», d'elavurar in project; cun la construcziun duai vegnir cumenzà l'onn 1975. La crisa economica e la diminuziun dal traffic da rauba colliada cun quai frainan dentant il project. Bloccà vegn el er da la Svizra occidentala e da la Svizra orientala. La Svizra orientala sa referescha a l'empermischun d'ina viafier orientala da las Alps da l'onn 1878, che prevesa ina colliaziun orientala tranter nord e sid.
« La realisaziun d'in concept da transit tras las Alps è, a lunga vista, giavischabel er ord vista militara. »
Schef dal stab general colonel divisiunari Borel, Brev a l'Uffizi federal da traffic, 05.09.1973
