L'onn 2003 sa il parlament che las circa 15 milliardas francs ch'eran en il fratemp previsas per la NVTA (basa da pretsch 1998) na vegnan betg a bastar. L'onn 2007 preschenta il Cussegl federal ina «Vista cumplessiva davart la construcziun e davart la finanziaziun da projects da l'infrastructura dal traffic public». Ils custs da la NVTA vegnan stimads ussa a circa 19 milliardas francs, ma questa summa signifitga ch'i vegnan stritgads or dals plans da la NVTA il tunnel da basa dal Zimmerberg, il tunnel dal Hirzel ed ulteriuras lingias d'access. Questas ultimas vegnan tuttina realisadas en il rom dal svilup futur da l'infrastructura da viafier (SIV). Il mars 2009 augmenta il parlament il credit per la NVTA ch'è vegnida redimensiunada anc ina giada sin 19,1 milliardas. Al SIV conceda il parlament 5,4 milliardas francs. Ussa è la NVTA finanziada definitivamain.
« La construcziun da la NVTA dovra dapli daners ch'èn vegnids sbursads fin ussa per quai. »
Il Cussegl federal, Missiva, 17.10.2007
