Cur ch'il Cussegl federal Moritz Leuenberger visita ils 18 d'avrigl 1996 la regenza dal chantun Uri per discutar davart la NVTA, èn avertas bleras dumondas: la planisaziun dal territori, la protecziun da l'ambient, il termin da la construcziun dals trajects d'access. Per la populaziun da l'Uri èsi impurtant che quels vegnian averts a medem temp sco l'axa dal Gottard. Els teman che lur giavischs vegnian uschiglio a la curta. Il chantun Uri realisescha sia posiziun en tractativas stentusas e plain conflicts en quel senn, ch'il Cussegl federal accepta da spustar il traject d'access al tunnel da viafier en il munt. Malcuntent è l'Uri però ch'i na dat betg anc in termin temporal per la construcziun.

« Dapli grevezzas per l'ambient, ina perdita quasi totala da noss terren ed a medem temp in distatgament sensibel da l'access a la viafier per pliras regiunas spetgan nus. Persuenter sa megliereschan las pussaivladads da spustament en il traffic da transit e datti intgins impuls per l'economia publica. »

Ambros Gisler, directur da l'economia publica dal chantun Uri, Formulaziun dals giavischs da l'Uri a chaschun da la visita dal cusseglier federal Moritz Leuenberger, 16-04-1996