Al cumenzament dals onns 1980 prendan il Cussegl federal ed il parlament cumià dals plans per ina viafier planiva tras las Alps. Questa decisiun na resta betg senza reacziun. En sia dissertaziun («Der alpenquerende Verkehr. Dargestellt am Ausbau einer neuen Eisenbahntransversale durch die Schweiz»), ch'il econom Hans-Jörg Bertschi inoltrescha l'onn 1985 a l'Universitad da Son Gagl, demussa el sin radund 700 paginas la necessitad d'ina nova viafier tras las Alps. Il resun dal public è grond e la dissertaziun procura per novas discussiuns davart la transversala da las Alps en la politica. L'autur vegn invulvì pliras giadas en las lavurs da planisaziun da la NVTA. Sias enconuschientschas preschenta el prominentamain en las medias. Questa ovra surpiglia pia il punct da partenza da la fasa da realisaziun da la NVTA. Bertschi resta attaschà al project. Pli tard daventa el president dal cussegl d'administraziun da la Hupac, ina interpresa impurtanta en il traffic da viafier nordsid.
« Ils resultats da quest studi mussan ch'ina nova lingia da basa ha, ord la perspectiva europeica ed en cumparegliaziun cun ina schliaziun nulla, avantatgs eclatants per l'economia generala. »
Hans-Jörg Bertschi, Resumaziun per mauns dal Cussegl da l'Europa, p. 15, 1. da schaner 1986