En la litteratura è la viafier dal Gottard savens in tema. Per incumbensa da la societad da la viafier dal Gottard descriva Carl Spitteler l'onn 1897 in viadi cun il tren tras il Gottard e l'istorgia dal Gottard. L'onn 1947 cumpara il roman istoric da Felix Moeschlin «Wir durchbohren den Gotthard». Moeschlin è in represchentant plain influenza da la defensiun spiertala da la patria. La litteratura da quel temp ha marcà il maletg svizzer da las viafiers da muntogna: ellas ed en spezial il Gottard sco liom d'ina capodovra da l'inschigneria e da la capacitad da prestaziun da la Svizra, ina naziun fundada sin la voluntad politica. L'episoda da la buttiglia da sirup en il tunnel a spirala descritta en il cudesch per la giuventetgna da Klaus Schädelin «Mein Name ist Eugen» (1955) sa legia anc adina cun grond divertiment. Il cudesch è vegnì filmà l'onn 2005.
« Damai che la notg la pli maiestusa en in tunnel na sa distingua insumma betg d'ina notg ordinaria en in tschaler, croda la tensiun bainbaud per mancanza da nutriment. »
Carl Spitteler, Il Gottard, Frauenfeld 1897, p. 53
