Da la svelta colliaziun da la NVTA tras il Gottard profita per exempel il chantun Tessin che registrescha cleramain dapli pernottaziuns (l'onn 2017 è il dumber da pernottaziuns en hotels ed en pensiuns s'augmentà per 7,7 pertschient sin 2,3 milliuns), entant che la Val d'Ursera en il nord e la Leventina en il sid èn en privel da perder lur impurtanza turistica. L'avegnir dal vegl traject da muntogna - che ha intgantà las viagiaturas ed ils viagiaturs da tren durant passa tschient onns cun ses panorama, cun ils tunnels da spirala a Wassen e las spiralas a Biaschina - è intschert. La ruta n'ha nagina clera funcziun sco il vegl traject dal Lötschberg cun ses transport d'autos. Tgi surpiglia ils immens custs da mantegniment? Duai il traject daventar patrimoni cultural mundial da l'UNESCO u duai el vegnir utilisà dapli per il traffic da martganzia? Las VFF e la Viafier dal Sidost planiseschan d'utilisar e da commerzialisar communablamain il traject a partir da l'onn 2021.
« Serrar il traject da muntogna dal Gottard n'è per motivs politics, istorics e per motivs pertutgant il traffic betg inditgà a curta u a media vista. »
Pagina d'internet da l'UFT, Rapport dal Cussegl federal, 2014