L'integraziun dals chantuns e da las regiuns da la Svizra procura l'onn 1991 per il consentiment dal parlament a la NVTA e per il gea da la votaziun dal pievel. Per la Svizra orientala signifitga quai ch'ella sto laschar crudar sia pretensiun da passa 100 onns d'obtegnair ina viafier da transit tras las Alps orientalas. Sco cumpensaziun per questa lingia empermetta il project da la NVTA l'integraziun da la Svizra orientala sur ina varianta da rait, pia l'engrondiment da las lingias da viafier che mainan al Gottard sur Turitg e sur Rapperswil. Gia l'onn 1989 è la gruppa da lavur che s'occupa da quai sa radunada per l'emprima giada. Ils tunnels dal Zimmerberg e dal Hirzel duain garantir la colliaziun da la Svizra orientala. Ma pervia da las redimensiuns da la NVTA, chaschunadas da las finanzas, vegnan ils projects dentant suspendids per in temp illimità.
« Las regenzas dals chantuns da la Svizra orientala na pon betg sa declerar perencletgas cun quest giudicament. »
Regenzas dals chantuns GL, SH, AR, AI, SG, GR, TG, Brev al Cussegl federal, 28.02.1985